ພິທີເຊັນສັນຍາ ຊື້-ຂາຍໄຟຟ້າ ເຂື່ອນນ້ຳຊຳ3 ຢູ່ແຂວງ ຫົວພັນ

ໃນໂອກາດສະຫາຍ ຮອງນາຍົກລັດຖະມົນຕີແຫ່ງ ສສ ຫວຽດນາມ ໄດ້ມາເຄື່ອນໄຫວເຮັດວຽກຢູ່ ສປປ ລາວ ໃນລະຫວ່າງວັນທີ່ 24-25 ມິຖຸນາ 2019, ໂອກາດນີ້ ສະຫາຍ ຈິງ ດິງ ຢຸງ ຮອງນາຍົກລັດຖະມົນຕີ ສສຫວຽດນາມ ກໍ່ໄດ້ພົບປະກັບ ສະຫາຍ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ເພື່ອເສີມຂະຫຍາຍສາຍພົວພັນຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມໃຫ້ຈະເລີນງອກງາມຍິ່ງໆຂຶ້ນ ແລະ ພາຍຫລັງສຳເລັດການພົບສອງຝ່າຍຮອງນາຍົກລັດຖະມົນຕີລາວ ແລະ ຫວຽດນາມ ກໍ່ໄດ້ເປັນກຽດເຂົ້າຮ່ວມໃນພິທີເຊັນສັນຍາການຊື້-ຂາຍໄຟຟ້າ ເຂື່ອນໄຟຟ້ານ້ຳຊຳ 3 ລະຫວ່າງ ທ່ານ ພົງສະຫວັດ ເສນາພວນ ອຳນວຍການໃຫຍ່ ບໍລິສັດນ້ຳຊຳ ທີ່ຂຶ້ນກັບ ກຸ່ມບໍລິສັດ ພົງຊັບທະວີ ຈຳກັດຜູ້ດຽວ ແລະ ທ່ານ ເຈີນ ດິງ ເຢີ້ນ ( Mr Tran Dinh Nhan ) ຜູ້ອຳນວຍການໃຫຍ່ ລັດວິສາຫະກິດ ໄຟຟ້າ ຫວຽດນາມ, ໂດຍມີພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໂຄງການເຂື່ອນໄຟຟ້າ ນ້ຳຊຳ3 ຕັ້ງຢູ່ເມືອງຊຳໃຕ້, ແຂວງຫົວພັນ ເຂື່ອນດັ່ງກ່າວເປັນເຂື່ອນຫິນຖົມ ແລະ ລາດໜ້າດ້ວຍເບຕົງ, ມີຄວາມສູງ 120 ແມັດ, ສາມາດເກັບນ້ຳໄດ້ 443 ລ້ານແມັດກ້ອນ, ມີກຳລັງຕິດຕັ້ງ 156 ເມກາວັດ, ສາມາດຜະລິດໄຟຟ້າໄດ້ 626 ກິໂລວັດໂມງຕໍ່ປີ ກະແສໄຟຟ້າສົ່ງຂາຍໄປຫວຽດນາມດ້ວຍລະບົບສາຍສົ່ງ 220 ກິໂລໂວນ, ຄວາມຍາວສາຍສົ່ງຈາກໂຄງການໄປຫາຊາຍແດນ 40 ກິໂລແມັດ.